OOS-KAAP. – Pamela Mabini (46) van Maro Foundation is Vrydag in ‘n wit Chevrolet-bakkie in Tshaukastraat, Kwazakele, doodgeskiet.
Kapt. Sandra Janse van Rensburg sê Kwazekele-polisie is omstreeks 10:45 na ‘n klagte van ‘n skietinsident. Met aankoms is Mabini se liggaam met verskeie skietwonde in die bakkie aangetref. Van Rensburg sê geen verdere inligting is beskikbaar nie. ‘n Moordsaak word ondersoek.
Enigiemand met relevante inligting oor die misdaad word gevra om speur.kol. Anthea Hector van Kwazekele by 082 457 5036 te bel.
Volgens Women For Change is Mabini buite haar huis doodgeskiet en daar word geglo dit was die tweede poging om haar lewe te neem, nadat daar in 2018 ook ‘n insident was. Mabini is as ‘n aktivis vir slagoffers van geslagsgebaseerde geweld en mensehandel beskryf, wat ook verlate kinders en haweloses van kos, skuiling en lewensmiddele voorsien het.
