WES-KAAP. – ’n Polisiebeampte (48) wat van diens af was, is Maandagaand in Browns Farm op die Kaapse Vlakte doodgeskiet. Hy is in die bolyf geskiet, waarna twee verdagtes glo van die toneel gevlug het.
Luidens ‘n verklaring van brig. Novela Potelwa was die oorledene verbonde aan die Pinelands Rapid Rail Unit en is hy op die toneel dood verklaar. Die Valke ondersoek die moordsaak, onder andere die motief vir die moord.
Lt.genl. Thembisile Patekile, die provinsiale polisiekommissaris in die Wes-Kaap, het sy meegevoel met die oorledene se familie en kollegas betuig. Potelwa sê geen inhegtenisnemings is nog gemaak nie en die identiteit van die oorledene word weerhou totdat sy naasbestaandes ingelig is.
Ian Cameron, lid van die Nasionale Vergadering, en voorsitter van die parlementêre portefeuljekomitee vir polisie, sê die dood van ’n polisiebeampte dra by tot ’n groeiende en kommerwekkende patroon waarvolgens polisiebeamptes toenemend geteiken word, hetsy aan diens of by hul huise. Dit terwyl gewelddadige misdadigers in sekere gebiede met min gevolge optree.
“Wanneer beamptes nie veilig is nie, is gemeenskappe nie veilig nie,” sê Cameron. Hy het sy meegevoel met die oorledene se familie, kollegas en geliefdes uitgespreek, maar bygevoeg dat simpatie alleen nie voldoende is nie.
Cameron sê die SAPD se leierskap moet rekenskap gee oor hoe beamptes beskerm word, hoe verdagtes opgespoor word en waarom arrestasiesyfers in sulke sake laag bly. Volgens hom sal die geweld sonder werklike gevolge en doelgerigte optrede teen gewapende bendes en herhalende oortreders voortduur.
