Polisielid en nog verdagtes in hegtenis geneem nadat man sterf

Lees ook :

Foto: Community Support Forum

GAUTENG. – Michael Pule Tau (54), Musa Kekane (36) en Dany Floyd Mabusela (46) is in hegtenis geneem nadat Armand Swart verlede Woensdagoggend by sy werksplek se hek in Duncanville in ‘n koeëlreën gesterf het. Een van die verdagtes is ‘n adjudant-offisier in die polisie.

Kol. Noxolo Kweza sê Swart het by sy werk se hek gewag toe die verdagtes op sy voertuig geskiet het. Hy is op die toneel dood verklaar.

Die polisie het later die verdagtes in Bramley in hegtenis geneem en verskeie vuurwapens gekonfiskeer. Sake van moord, die besit van ongelisensieerde vuurwapens en poging tot moord word ondersoek.

Die hofsaak is tot 30 April uitgestel waartydens die verdagtes se formele borgaansoeke aangehoor sal word.

Lt.genl. Tommy Mthombeni, die provinsiale kommissaris, het die inhegtenisneming van ‘n polisielid as ‘n verdagte in die saak geprys. Hy het die pogings om misdadiger-polisielede aan die kaak te stel, beklemtoon en geprys.

Die polisie vra enigiemand met inligting van die voorval om na vore te kom.

Swart het blykbaar omstreeks 07:00 die hek na sy werksplek in Van Riet Lowestraat oopgemaak om in te ry. In hierdie tyd is hy glo vanuit ‘n verdagte voertuig geskiet. Hy is na bewering 20 keer getref.

Bronne: SAPD en Caxton Network News