OOS-KAAP. – ’n Polisiekonstabel word in ’n hospitaal behandel nadat hy Sondagaand tydens ’n skietvoorval in Missionvale, Gqeberha ernstig gewond is.
AO Majola Nkohli, polisiewoordvoerder, sê in ‘n verklaring lede van die Algoa Park-polisiekantoor was omstreeks 23:00 op roetinepatrollie in Jackweg, toe ’n onbekende man tussen huise verskyn en op die patrollievoertuig begin skiet het. Die konstabel is verskeie kere raakgeskiet en met haas na ’n hospitaal geneem. Die aanvaller het intussen op die vlug geslaan en is steeds voortvlugtig.
’n Saak van poging tot moord is geopen en die polisie het ‘n soektog van stapel gestuur om die gewapende verdagte vas te trek.
Enigiemand met relevante inligting word gevra om speur.AO Errol Kleinhans by 083 243 4567 te bel.
