WES-KAAP. – Senzo Mchunu, die polisieminister, het sy ernstige kommer en afkeur uitgespreek ná ’n reeks massamoorde dié week die Wes-Kaap geskok het.
Kamogelo Mogotsi, woordvoerder vir die polisieminister, sê in ‘n verklaring aan Nuusflits sewe mans is Saterdag in die Kanana- informele nedersetting in Gugulethu doodgeskiet. Luidens voorlopige verslae is die mans vermoedelik in ’n hinderlaag gelok terwyl hulle gesellig verkeer het.
Hierdie voorval volg op ’n week van geweld waartydens die liggame van drie mans, tussen 26 en 35 jaar, Dinsdag op verskillende plekke in die C-gedeelte van die Samora Machel- informele nedersetting aangetref is. Donderdag het drie vermeende kapers in ‘n skietvoorval tydens ‘n klaarblyklike kaping in Nyanga gesterf.
Hierdie en ander misdade het die loods van Operasie Shanela 2 Vrydag genoodsaak en ingryping is met onmiddellike effek opgeskerp.
Minister Mchunu het die moorde veroordeel en gesê: “Met die jongste skietery van sewe mense in Gugulethu is daar geen twyfel dat die Kaapse Vlakte in Kaapstad inderdaad die slagveld van die Wes-Kaap geword het nie. Wat die Polisie-ministerie en Polisie-topbestuur moet weier om te doen, is om hierdie voorvalle as ’n normale neiging te hanteer en die gewone metodes van polisiëring toe te pas. Die situasie vereis volle implementering van wat die Ministerie en Bestuur oor ’n geruime tyd bespreek het. Hierdie wending van gebeure is lelik en stel fondamentele vrae oor die veiligheid van mense in daardie gebied. Een ding is duidelik: moordenaars is daar buite om te dood. Dit is asof ons moet kies tussen die mense en die moordenaars — ons het eintlik geen keuse nie. Die polisie het ’n mandaat om mense se lewens en liggame te beskerm, met geen hulpbronne te bespaar nie. Die situasie verg ’n geteikende benadering voordat hierdie moordenaars hul terreur op mense verskerp. Hulle is nie onbekend aan die polisie nie — hulle moet opgespoor en gekonfronteer word.”
“Dit is vir hierdie doel dat Operasie Shanela 2 Vrydag van stapel gestuur is. Die operasie is ontwerp om beslissende optrede teen hoë moordsyfers, die verspreiding van onwettige vuurwapens, dwelmhandel en geslagsgebaseerde geweld en vrouemoord (GBVF) te neem. Dit verteenwoordig ’n verskerpte, intelligensie-gedrewe benadering wat SAPD- operasionele eenhede, gespesialiseerde taakspanne en inter-regeringsamewerking insluit. Ons doen ’n beroep op alle vlakke van die polisiebestuur om beslissend en dringend op te tree, en beklemtoon dat gemeenskappe nie aan vrees en onder beleg oorgelaat kan word nie. Ons versoek die Nasionale Kommissaris en sy span om alle polisiehulpbronne te aktiveer en in te span om misdadigheid en misdadigers te konfronteer. Lede van die publiek word versoek om wetstoepassingspogings te ondersteun deur inligting te deel wat tot inhegtenisnemings kan lei en kan help om oortreders aan geregtigheid uit te lewer. Polisie-sigbaarheid, gemeenskapsbetrokkenheid en geteikende ingrypings sal met onmiddellike effek verskerp word.”
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
