LIMPOPO. – ‘n Polisiesersant (43) is vir beweerde versekeringsmoord vasgetrek, nadat sy sedert 2019 die begunstigde van haar slagoffers se polisse was en toe reeds haar vermeende moordtog begin het.
Brig. Athlenda Mathe sê die ondersoek na die bewerings waarvolgens die sersant op ‘n bedrieglike wyse van begrafnisdekking, ongeluk- en lewenspolisse van verskeie banke en versekeringsmaatskappye gebaat het, het lank geneem.
“Haar slagoffers was aan haar bekend en was van behoeftige en benadeelde agtergrond en sommige was gestrem of verstandelik gestrem.”
Sy sou lewenspolisse en begrafnisdekking op die lewens van die slagoffers uitneem en haarself die begunstigde maak. Die sersant word tans met ses sake van beweerde moord verbind. Volgens bewyse het sy ten minste R10 m. in haar sak gedruk.
“Ná maande se ondersoek het die ondersoekspan ’n lasbrief vir arrestasie bekom. Die lasbrief is by die polisiestasie uitgevoer, waar sy in hegtenis geneem is.”
Mathe sê die sersant sal Vrydag op ses moordklagtes en sewe bedrogklagtes in die Polokwane-distrikshof voorkom.
