LIMPOPO. – ‘n Dwelmlaboratorium is tydens ‘n operasie deur lede van georganiseerde misdaad- en blitspatrollie in die Makotse-woonbuurt in Lebowakgomo ontdek.
Brig. Hlulani Mashaba sê ongeveer R4 m. se dwelms is gekonfiskeer en drie verdagtes is in hegtenis geneem. ‘n Beduidende hoeveelheid Mandrax-tablette is by ‘n verdagte se huis ontdek, waarna die dwelmlaboratorium daar naby gekry is. Verskeie chemikalieë wat in dwelmvervaardiging gebruik word, is ook gevind.
Die polisie se forensiese wetenskaplaboratorium het die toneel ondersoek.
Die verdagtes het Maandag vlugtig op aanklagte van die besit van en handel in dwelms in die Thabamoopo-landdroshof verskyn. Die saak is vir ‘n formele borgaansoek tot 7 Oktober uitgestel.
