GAUTENG. – Eugene Botha (43) het gister in die Germiston-landdroshof verskyn na hy glo sy ouers en suster op Rondebult aan die Oos-Rand vermoor het.
Dit volg na gemeenskapslede Dinsdagmiddag die ontbinde liggame van sy ouers, Johan en Jane Botha, en sy suster, Suné Botha, in ’n verlate bakkie gevind het.
Volgens die polisie het al drie slagoffers verskeie steekwonde opgedoen en hulle liggame is in komberse toegedraai. Die bakkie is nie ver nie van die Botha-gesin se huis af gevind.
Volgens kol. Dimakatso Nevhuhulwi, Gautengse polisiewoordvoerder, is hulle seun, Eugene Botha, Woensdagoggend in hegtenis geneem. Sy saak is na volgende Donderdag uitgestel wanneer hy aansoek om borg sal doen.
Eye Witness News berig die verdagte het gister aan die hof vertel hy is 25 jaar gelede vir bedrog skuldig bevind.
Bronne: EWN, Times Live
