KWAZULU-NATAL. – Roofverdagtes het Sondagoggend tydens ‘n huisroof in Amoutana gedreig om twee minderjarige meisies – vier jaar oud en ‘n baba – te ontvoer.
Reaction Unit South Africa sê ‘n oproep vir hulp is net na middernag ontvang. Met aankoms by die huis het ‘n slagoffer vertel sy en haar twee kinders was tuis toe ongeveer agt verdagtes toegang tot die huis gekry het. Meeste was met klapmusse vermom. Waardevolle items is geëis.
“As hulle ma versuim het om instruksies na te kom, is daar gedreig om die minderjarige meisies te ontvoer.”
Rusa sê die huis is geplunder, waarna die verdagtes met onder meer ‘n televisie en die kinders se identiteits- en geboortesertifikate in ‘n Toyota Quantum gevlug het.
“Die slagoffers is nie beseer nie.”
