Nuwe bestuurderslisensiekaarte sal na verwagting voor die einde van April gedruk word.
Sindisiwe Chikunga, die minister van vervoer, het aangedui die vervoerdepartement is op die punt om die masjien vir die druk van die kaarte aan te skaf.
Wanneer die nuwe sisteem in gebruik is, sal die nuwe kaarte binne vyf dae beskikbaar kan wees, wat nege dae vinniger as tans is. Die kaarte sal vir agt jaar geldig wees. Huidige kaarte sal tot 31 Maart 2029 geldig wees.
Die nuwe bestuurderslisensiekaart sal aan nuwe slimkaart-tegnologie gekoppel wees en sal nuwe verbeterde veiligheidskenmerke hê. Dit sluit biometriese data, hologramme en watermerke, om bedrog te verminder, in.
Die kaart sal met internasionale inligtingstegnologie versoenbaar wees (ISO 18013).
Bronne: Caxton Network News, Higveld Newspaper, Kempton Express, Ridge Times Newspaper
