NOORDWES. – Mpho Alistair Lesolle (41), Johannes Botes Rossouw (58), Pieter Retief von Willigh (58), Ntlhayakgosi Michael Mokgwamme (66) en Merika Johannes Madungandaba (66) het Woensdag op beskuldiging van bedrog in die Rustenburg-landdroshof verskyn.
Lt.kol. Tinyiko Mathebula, woordvoerder van die Valke, sê Rossouw, Von Willigh en Madungandaba is die direkteure van Malesela T&D Pty (Ltd). Die maatskappy het glo in 2013 ‘n kontrak vir die installasie van skakeltoestelle (switchgear) vir Ikemeleng Bulk Infrastucture met Rustenburg se plaaslike munisipaliteit gehad. Lesolle en Mokgwamme is voormalige werknemers van die munisipaliteit en was in beheer van die projek. Hulle moes seker maak die projek word afgehandel.
“Verslae dui daarop dat die munisipaliteit Malesela se maatskappy in September 2013 meer as R2 m. betaal het om skakeltoestelle volgens die kontrak te installeer.”
Mathebula sê ondersoek het opgelewer dat geen diens gelewer is nie. Die beskuldigdes is gedagvaar om in die hof te verskyn.
“Al vyf beskuldigdes het vlugtig in die hof verskyn en is op waarskuwing vrygelaat.”
Die saak is tot 21 Augustus uitgestel.
