Die Suid-Afrikaanse Agentskap vir Maatskaplike Sekerheid (Sassa) gaan voort met die hersiening van toelaes vir begunstigdes wat moontlik ander inkomste het wat nie verklaar is nie.
Begunstigdes wat vir hersiening gemerk is, moet hulself by ’n plaaslike Sassa-kantoor aanmeld. Versuim om dit te doen, kan lei tot opskorting en uiteindelike kansellasie van die toelae. Volgens wetgewing moet alle inkomste tydens aansoek en enige veranderinge daarna by Sassa aangemeld word.
Sassa fokus op individue wat aktief in die arbeidsmark is en wie se inkomste die kwalifiserende drempel oorskry. Daar is nog geen toelaes opgeskort nie, maar betalingskedules is aangepas om met betrokke begunstigdes te kommunikeer.
“Sassa sal optree teen enige bedrog, en amptenare wat saam met begunstigdes kul, sal dissiplinêr en strafregtelik vervolg word,” het die nasionale woordvoerder, Paseka Letsatsi, gesê.
Lees die volledige verklaring hier.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
