PRETORIA, GAUTENG. – ‘n Seekoeikoei is Vrydag en Saterdag by die Sable Hills Waterfront-landgoed langs Roodeplaat-dam in Pretoria opgemerk.
Inwoners van die landgoed is gewaarsku om nie hulle huise te verlaat of die seekoei te probeer nader nie. Sy is Saterdag om 12:00 langs die dam in Nightjarstraat gesien.
Natuurbewaring is geskakel. Inwoners is gewaarsku dat sy steeds ’n wilde dier is, al is dit alombekend dat sy nie gewelddadig is nie.
Volgens inwoners is Gloria, die seekoei, ’n gereelde besoeker. Sy was ook al in die omgewing van Kameeldrift-Oos opgemerk waar inwoners bordjies opgesit het om besoekers van haar teenwoordigheid bewus te maak.
“Die mense moet haar eerder help beskerm as om haar leed aan te doen,” sê een inwoner op sosiale media.
In 2013 is ‘n seekoei genaamd Bubble naby die Leeufontein-landgoed langs die dam opgemerk.
Bronne: Pretoria FM, Facebook, IOL
