GAUTENG. – Vusimuzi “Cat” Matlala is saam met verskeie senior SAPD-beamptes, insluitend kapt. Brian Neville, brig. Rachel Matjeng, Alpheus Thembinkosi Ngema, Patrick Nethengwe, Kirsty Jonker, Petunia Reabetsoe Lenono en Onica Ofentse Tlhoale, asook genl.maj. Busisiwe Precious Temba, kol. Nonjabulo Nomfundo Mngadi, Anton Paulsen en Natsenge Johannes Monyai in hegtenis geneem oor beweerde korrupsie met ’n tender van sowat R360 miljoen wat aan Medicare24 toegeken is.
Henry Mamothame, NVG IDAC-woordvoerder, sê die saak spruit uit bewerings dat lede van die polisie se bod-evalueringskomitee saamgespan het om die kontrak onregmatig toe te ken. Dit sluit ook ander beskuldigdes in, onder meer ’n diensverskaffer en ’n verkrygingsbeampte. Volgens die ondersoek is die tender aan Medicare24 toegeken ondanks die feit dat die maatskappy glo nie oor die nodige hulpbronne beskik het nie. Die kontrak, wat vir ongeveer R360 miljoen begroot is, is aan ’n bod van sowat R228 miljoen toegeken, en meer as R50 miljoen is reeds uitbetaal voordat die ooreenkoms gekanselleer is. Daar word verder beweer dat sekere beskuldigdes finansieel voordeel getrek het uit die kontrak. Die saak is in 2024 vir ondersoek verwys en word nou as ’n voorbeeld genoem van hoe tenderprosesse binne staatsinstellings, insluitend wetstoepassing, gekompromitteer kan word.
Die beskuldigdes staan tereg op aanklagte van korrupsie, bedrog en oortreding van die Wet op Openbare Finansiële Bestuur. Sommige van die beskuldigdes is op borgtog tussen R40 000 en R80 000 vrygelaat, terwyl die saak vir verdere ondersoek uitgestel is.
In ‘n onverwante saak is Matlala, saam met Sakani Matlala, sy lewensmaat, Musa Kekana en Tiego Floyd Mabusela aangekla van poging tot moord, bedrog en regsverydeling wat spruit uit die beweerde sameswering deur die beskuldigdes tussen 12 en 17 Oktober 2023 in Johannesburg om Tebogo Thobejane te vermoor. Matlala se naam is ook deur lt.genl. Nhlanhla Mkhwanazi genoem in die ontbloting van ‘n beweerde nasionale sindikaat wat volgens hom politici, regslui, wetstoepassers en sakemanne insluit, met ‘n beweerde verbintenis aan Senzo Mchunu, die polisieminister.
