KWAZULU-NATAL. – Nadat ‘n 5-jarige kind in Umlazi ontvoer en ‘n losprys geëis is, is ‘n verdagte tydens ’n gesamentlike operasie deur die Durban-metropolisie se opsporingseenheid, saam met die polisie en misdaadintelligensie, in hegtenis geneem.
Durban Metro Police Service sê in ‘n sosialemediaplasing nadat die kind ontvoer is, is R60 000 van die gesin in ruil vir sy vrylating geëis. ‘n Wenk het die span na die Umzimkhulu-omgewing gelei waar ’n verdagte op aanklagte van ontvoering en afpersing aangekeer is. Tydens die ondersoek het dit aan die lig gekom dat die kind moontlik skade aangedoen is. Soek-en-redding-spanne is ontplooi om ’n deeglike soektog in die betrokke gebied te loods.
Die ondersoek duur voort, en verdere operasies word beplan om bykomende verdagtes wat aan ontvoeringsnetwerke verbind kan word, op te spoor.
Nuusflits het polisiekommentaar gevra.
