WES-KAAP. – Die liggaam van ‘n seun (9) wat reeds Donderdag vermis geraak het, is Saterdag omstreeks 16:30 in Haarlem gevind. Die polisie ondersoek die seun se dood.
Sers. Christopher Spies sê aan Nuusflits die seun is nie as vermis aangemeld nie en gemene spel word nie vermoed nie. ‘n Geregtelike doodsondersoek is deur die Uniondale-polisie geopen om die oorsaak van die seun se dood met ‘n nadoodse ondersoek vas te stel.
Spies sê egter die arrestasie van ‘n vrou (37) is nie aan die dood van die seun verwant nie. Sy is op ‘n uitstaande lasbrief gearresteer omdat sy in Desember versuim het om in die hof te verskyn. Die vrou het toe wel Maandag in die hof verskyn, waarna die saak tot 15 Januarie uitgestel is. Sy bly in aanhouding.
Christo Vermaak van Hinterland Herald sê die oorledene is die gearresteerde vrou se seun.
