OOS-KAAP. – ’n Seun (7) word steeds vermis nadat hy en drie meisies Sondag, net voor 13:00, by Mdumbi-strand deur seestrome meegesleur is. Die plaaslike kinders, tussen 7 en 13 jaar oud, was saam met familie by die strand, wat ongeveer 24 km noord van Koffiebaai aan die Wildekus geleë is.
Volgens Craig Lambinon, NSRI-woordvoerder, is die tragedie aangemeld terwyl dit besig was om te gebeur. Lewensredders wat van diens was, het hulle na die strand gehaas. Mdumbi Backpackers-vrywilligers kon die drie meisies uit die see red. Een meisie (13) is vir nie-noodlottige “verdrinking” op die strand behandel en na ‘n hospitaal geneem. Die ander twee meisies is ongedeerd. Die seun word egter steeds vermis. Soektogte deur die polisie, NSRI-lewensredders en vrywilligers duur voor, sê Lambinon.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
