OOS-KAAP. – ‘n Dodelike skietvoorval het vanmiddag (Donderdag) by Laerskool Ntabankulu plaasgevind. Twee persone is dood en nog twee is beseer.
Luidens ‘n polisieverklaring van die woordvoerder, brig. Nobuntu Gantana, het ’n voormalige onderwyser, wat tans op borgtog was in verband met seksuele aanrandingsklagte wat leerders betrek, glo omstreeks 12:00 toegang tot die skool verkry nadat hy deur die omheining gesny het. Die verdagte het hom na die skoolkombuis begewe waar hy drie onderwysers geskiet het, voordat hy homself doodgeskiet het. Een onderwyser is op die toneel dood verklaar, terwyl twee ander beseer is en mediese behandeling ontvang. Die verdagte is ook op die toneel dood verklaar.
Die polisie het bevestig dat ’n volledige ondersoek van stapel gestuur is, wat die moontlike verbreking van borgtogvoorwaardes insluit. Die toneel is afgesper vir forensiese ondersoeke.
