MPUMALANGA. – ‘n Skietery wat Donderdag in Sabie tussen beweerde onwettige myners en die owerhede uitgebreek het, word ondersoek. Drie van die “myners” is doodgeskiet.
Brig. Donald Mdhluli sê volgens rapportering was die polisie en ander wetstoepassingsowerhede in die omgewing van die Village-skag met roetine-patrollie besig, toe daar op hulle geskiet is en hulle teruggeskiet het. ‘n Adjudant-offissier van die honde-eenheid is in die been geskiet en is vir mediese behandeling na ‘n hospitaal geneem, terwyl drie “onwettige myners” noodlottig gewond is. Twee AK-47-aanvalsgewere en ongeveer 500 rondtes ammunisie is op die toneel gevind.
‘n Saak van poging tot moord word ondersoek en die onafhanklike polisie-ondersoekdirektoraat (Opod) sal die omstandighede van die skietery behartig.
