KWAZULU-NATAL. – ‘n Slagoffer van beweerde verkragting in Tongaat het Dinsdag, nadat hy sy bewussyn herwin het, die verkragtingsverdagte herhaaldelik met ‘n sakmes gesteek.
Reaction Unit South Africa sê die verdagte het glo die seun genader en hom ‘n drankie aangebied. Die seun het na bewering sy bewussyn verloor en toe hy bykom, was die verdagte besig om hom in ‘n bos te verkrag. Nadat die seun die verkragtingsverdagte met die mes gesteek het, is hy reguit polisiestasie toe om ‘n saak te open.
Rusa-beamptes is omstreeks 22:50 na Temple-rylaan in die Mitchell-woonbuurt waar ‘n ernstig beseerde man (47) aan die kant van die pad aangetref is. Hy het Rusa-beamptes ingelig hy is beroof.
Die polisie is na die toneel ontbied en hulle het bevestig ‘n seun is besig om ‘n verkragtingsaak by die polisiestasie te open. Die beseerde man se beskrywing het met dié van die beweerde verdagte ooreengestem.
Toe die seun op die toneel aankom, het hy bevestig die beseerde man is dieselfde een wat hom verkrag het.
“Daar word vermoed dat die verdagte gesoek is vir die seksuele aanranding van ander minderjarige seuns.”
Nuusflits het polisiekommentaar gevra.
