WES-KAAP. – ‘n Man en ‘n vrou is Saterdagoggend omstreeks 01:30 op ‘n gasteplaas in Uitkykstraat, Franschhoek, aangeval waar hulle oornag het. Die Franschhoek-polisie ondersoek ‘n saak van huisroof.
Kapt. Frederick van Wyk, polisiewoordvoerder, sê die slagoffers is deur drie vermomde aanvallers aangerand. Die man en vrou is met kopbeserings vir mediese behandeling na ‘n hospitaal geneem.
Enigiemand met relevante inligting is gevra om na vore te kom.
Franscchoek First Responders sê in ‘n sosialemediaplasing dié diens het in die vroeë oggendure op nog ‘n plaasaanval in die gebied gereageer. Volgens die plasing is Mike Charlie 1 en ER24 onmiddellik ontbied om bystand te verleen. Albei slagoffers het die aanval oorleef, maar ernstige beserings opgedoen. Hulle is vir verdere behandeling na Mediclinic Paarl vervoer. Dié diens het @tsuprotection One Security, Dogs and All, Franschhoek SAPD en Pepler Alarms vir ondersteuning op die toneel bedank.
