LIMPOPO.– Makhado-polisielede het Vrydag ’n klopjag geloods na vier verdagte mans ná ’n sakeroof wat Donderdagoggend kort na 02:00 op ’n plaas langs die Fort Edward–Makhado-pad plaasgevind het.
Luidens ‘n verklaring deur kol. Malesela Ledwaba was ’n 28-jarige man in die plaashuis toe hy hoor iemand probeer om ’n venster oop te maak. Toe hy ondersoek instel, het ‘n verdagte glo ’n vuurwapen op hom gerig en hom beveel om die deur oop te maak. Hy is daarna met die kolf van die vuurwapen teen die voorkop geslaan, vasgebind en gedwing om op die vloer te lê. Twee verdagtes het glo 15 bruin en swart skape met IVP-oormerke, ter waarde van ongeveer R67 500, in ’n voertuig gelaai. Die klaer se selfoon is ook gebuit voordat die verdagtes van die toneel gevlug het.
’n Sakeroof is geopen en die ondersoek duur voort. ‘n Soektog is geloods om die verdagtes op te spoor en die gesteelde vee te herwin.
