WES-KAAP. – Aldrin Andile Baldwin Ncobo en Salomie Twaise Ncobo het Maandag op aanklagte van bedrog en geldwassery, wat met ‘n donasie van R15 m. vir skoolbouprojekte in die Oos-Kaap verband hou, in die Bellville-Landdroshof verskyn en is op borg vrygelaat.
Eric Ntabazalila, woordvoerder vir die NVG, sê Ncobo is op R50 000 en sy vrou op R30 000 borg vrygelaat. Die saak is tot 29 Mei vir verdere ondersoek uitgestel. Volgens die staat het Ncobo en sy vrou ‘n skema begin om geld op bedrieglike wyse van PetroSA, ten gunste van hulself, familielede, en/of entiteite waarin hulle ‘n belang gehad het, te bekom.
PetroSA het ‘n maatskaplike beleggingsprogram bestuur wat geldelike donasies aan behoeftige skole, instellings, of rampbestuursprogramme toegestaan het. In 2008 het Junior Sekondêre Skool Gangatha in die Oos-Kaap aansoek gedoen vir ‘n donasie om nuwe klaskamers, administrasiekantore, ablusiegeriewe, ‘n wetenskaplaboratorium, rekenaarlaboratorium, sportfasiliteite en ‘n sekuriteitsheining te bou. PetroSA het ingestem om R13 miljoen aan die projek toe te ken, waartydens die ongeregistreerde King’s Gangatha Building Trust gestig is om die befondsing en konstruksie te fasiliteer. Ncobo het toesig oor die konstruksie, wat in November 2008 begin en in September 2009 voltooi is, gehou. Die skool het hom egter nooit gemagtig om as verteenwoordiger op te tree of hom as projekbestuurder aangestel nie.
Nadat klagtes van onreëlmatighede en bedrog na vore gekom het, het PetroSA hoeveelheidopmeters aangestel om die waarde van die gelewerde dienste te bepaal. ‘n Ondersoek het bevind dat die materiale en dienste van swak gehalte was en nie ooreengekom het met die waarde van die donasie nie. Die koste is op R5,9 miljoen (BTW ingesluit) bepaal, met ’n bykomende R398 363 (BTW ingesluit) wat benodig sou word om die gebreke te herstel. Die staat beweer verder dat Ncobo verskeie wanvoorstellings aan PetroSA gemaak het met die indiening van ondersteunende dokumentasie van King’s Gangatha Building Trust vir die aansoek en goedkeuring van die donasie.
In ’n ander projek het Nqadu Pre-Grade R Skool in 2008 by PetroSA aansoek gedoen vir ’n donasie om ’n nuwe kleuterskool te bou. Ncobo se vrou was die kontakpersoon. PetroSA het R485 450 in Great Kei se bankrekening betaal. Ncobo het die skoolhoof meegedeel dat hy die skool met sy eie geld bou. Geen meubels of opvoedkundige toerusting is egter aan die skool gelewer nie. Lede wie se name op die dokumente aan PetroSA verskyn het, het ontken dat hulle bestuurslede is en hul handtekeninge betwis. ’n Interne ondersoek deur PetroSA se risiko-en-nakomingsafdeling het bevind dat hul beleggings by skole en entiteite waar die beskuldigdes betrokke was, nie die beoogde resultate gelewer het nie. Om die gebreke by Nqadu Pre-Grade R Skool reg te stel, is bepaal dat dit ’n verdere R20 093 (BTW ingesluit) sou kos.
Die aanklag van geldwassery hou verband met R15,19 miljoen wat na bankrekeninge van Gangatha Projects, Eseswe Projects, Aldrin Andile Baldwin Ncobo Charity Institute, en Aldrin Andile Baldwin Development ILE PR. Companies versprei is. Volgens die Kommissie vir Maatskappye en Intellektuele Eiendom (CIPC) was Gangatha Projects nie ’n geregistreerde entiteit nie. Ace Ncobo Development ILE Projects Close Corporation was wel geregistreer en Ncobo het ’n 100% belang daarin gehad. Eseswe Projects en die liefdadigheidinstelling was ook nie geregistreer nie.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
