WES-KAAP. – Die Stad Kaapstad se departement van ontspanning en parke gaan weer vanjaar op geselekteerde parke en oop spasies ophou gras sny om fynbos en inheemse plante kans te gee om te groei, blom en saad te versprei.
Die inisiatief vorm deel van die jaarlikse Lentegereedheidsprogram en sluit groenstroke, padgrense en parke in wat oorblyfsels van kritiek bedreigde plantegroei en hoë biodiversiteit bevat. Hierdie gebiede dien dikwels as verbindingskorridors tussen groter bewaringsgebiede, natuurreservate en nasionale parke.
“Deur die natuur sy gang te laat gaan, skep ons lewende bewaringskorridors in die stad en ’n kleurvoller, gesonder Kaapstad vir almal. Dit ondersteun bestuiwing, bevorder saadproduksie en beskerm ekologiese korridors,” het rdl. Higham, lid van die burgemeesterskomitee vir gemeenskapsdienste en gesondheid, gesê.
Die “geen grassny”-tydperk duur van Julie tot einde November. Tydelike kennisgewings is in deelnemende areas geplaas, terwyl ander parke volgens die jaarlikse skedule gesny sal word. ’n Lys van alle “geen grassny”-liggings is beskikbaar by https://bit.ly/41Bq61M.
Druk hier om meer te lees.
