VRYSTAAT. – ‘n Stiefma (36) wat ‘n 11-jarige seun herhaaldelik mishandel het, is deur die hof skuldig bevind en 10 jaar tronkstraf opgelê.
Kapt. Loraine Earle, polisiewoordvoerder, sê in ‘n verklaring die stiefma het die seun met ‘n stok geslaan, met ‘n warm yster gebrand en sy kop is op die vloer gestamp. Die stiefma is op twee aanklagte van aanranding met die doel om ernstige liggaamlike skade te doen, skuldig bevind en op elke aanklag 10 jaar gevonnis. Die vonnisse sal gelyklopend uitgedien word.
Sers. Katlego Pheko van die Mangaung-eenheid vir gesinsgeweld, kinderbeskerming en seksuele misdrywe (GKS) se speurwerk het gelei tot die skuldigbevindings. Dit het geregtigheid vir die jong slagoffer gebring en ‘n sterk boodskap gestuur dat misdade teen kinders nie geduld sal word nie.
Die stiefma is voorts ook onbevoeg verklaar om met kinders te werk en om ‘n vuurwapen te besit.
