’n Studie deur die Universiteit van die Vrystaat toon dat menstruasieprodukte wat in Suid-Afrika verkoop word, hormoonontwrigtende chemikalieë bevat, selfs dié wat as “vry van chemikalieë” bemark word.
Prof. Deon Visser, hoof van die departement chemie aan die UV, sê elke sanitêre doekie en broekie-insetsel wat getoets is, het minstens twee endokrien-ontwrigtende stowwe bevat. Die studie, gepubliseer in Science of the Total Environment, het 16 handelsmerke van sanitêre doekies en agt soorte broekie-insetsels ondersoek. Ftalate, bisfenole (insluitend BPA) en parabene is in baie van die produkte gevind. Die chemikalieë word nie altyd doelbewus bygevoeg nie, maar kan tydens vervaardiging oorgedra word. Hoewel die vlakke laag is, kan herhaalde maandelikse gebruik oor jare tot gesondheidsrisiko’s lei. Die studie wys ook op leemtes in regulasies en beperkte openbaarmaking deur vervaardigers.
Die navorsers vra vir duideliker etikettering en strenger standaarde om verbruikers beter te beskerm.
