GAUTENG. – ‘n Voorsitter van ‘n metertaxivereniging, asook ‘n taxi-eienaar, is Dinsdagaand in Pretoria doodgeskiet. ‘n Verdagte (30) is kort daarna in hegtenis geneem.
Lt.kol. Maveval Mosondo sê lede van die Rapid Rail-eenheid, wat by die spoorwegstasie was, het skote gehoor en na die toneel gehaas. Hulle het ‘n man opgemerk wat met ‘n vuurwapen in die rigting van die middestad hardloop. Polisielede het hom probeer voorkeer, maar hy het glo op hulle geskiet, waarop hulle teruggeskiet het. Die beseerde verdagte is in hegtenis geneem. Die vuurwapen wat vermoedelik tydens die misdaad gebruik is, is in die verdagte se besit gevind.
Masondo sê die voorlopige ondersoek het aangedui die verdagte van Inanda in KwaZulu-Natal het die taxi-eienaar geskiet. Die verdagte is onder polisiebewaking in ‘n hospitaal. Hy word vir moord en die besit van ‘n ongelisensieerde vuurwapen aangekla. Hy sal in die Pretoria-landdroshof verskyn wanneer hy uit die hospitaal ontslaan word.
Ondersoek word gedoen om vas te stel of die verdagte nie aan nog misdade, veral taxigeweldsmisdade, gekoppel kan word nie.
