BUENOS AIRES. – ’n Aanlyn tendens bekend as “therians” het die afgelope paar maande Argentinië se sosiale media oorgeneem. Op platforms soos TikTok het die hutsmerk #therian reeds meer as twee miljoen plasings bereik, met Argentinië wat ander Latyns-Amerikaanse lande in betrokkenheid oortref.
Volgens Euronews.com trek die verskynsel ook die aandag van beïnvloeders en verskeie mediaplatforms. Reaksies wissel van lag en verbasing tot woede en kritiek.
Die woord “therian” kom van “therianthrope”, ’n Griekse term wat half-mens, half-dier beteken. Die begrip het reeds in die 1990’s op internetforums begin sirkuleer. Vandag het die hutsmerk #therian miljarde kyke wêreldwyd. Daar is YouTube-kanale, podsendings en groepe met tienduisende lede wat die onderwerp bespreek, asook ’n konstante stroom inhoud op Reddit.
Therians is mense, dikwels tieners, wat sê hulle identifiseer geestelik, spiritueel of sielkundig met ’n dier. Hulle kom graag in parke bymekaar waar hulle soos diere optree – hulle hardloop handeviervoet oor gras, klim in bome of boots die bewegings na van die dier waarmee hulle hulself vereenselwig.
Sommige “therians” beskryf dit nie slegs as ’n stokperdjie of metafoor nie, maar as iets wat sentraal tot hul identiteit is.
Bronne: AP, Euronews.com
