MPUMALANGA. – ‘n Tienerseun (17) van die Wapadrand-boeredansgroep van Pretoria het Saterdag tydens die Boer en Brit-dag op Val, glo weens ‘n elektriese skok, gesterf.
Kol. Mavela Masondo, polisiewoordvoerder, sê aan Nuusflits die voorval het omstreeks 14:00 by die Groenvlei-spoorlyn in Val plaasgevind. Volgens voorlopige inligting was die tiener saam met ’n vriend toe hy op ’n stilstaande treinwa geklim het om binne-in te kyk. Hy het na bewering aan ’n elektriese draad geraak terwyl hy bo-op die wa was en is op die toneel dood verklaar.
Polisie het ’n geregtelike doodsondersoek geopen en die ondersoek duur voort.
Die Boer en Brit-dag is op wat as die kleinste dorpie in die land bestempel word gehou en selfs ‘n skyngeveg van die whisky-treinvoorval is gehou. Die Wapadrand-boeredansgroep het Saterdag gesê: “Die jaarlikse Boer en Brit-fees was weer onvergeetlik! ‘n Klomp danse, heerlike kos en wonderlike mense maak dat enige klein dorpie tuis voel.”
Rita Britz, die eienaar van die Val-hotel en organiseerder van die Boer en Brit-dag, het haar medelye met die oorledene se geliefdes uitgespreek.
Foto: Wapadrand Boeredansgroep
Bronne: SAPD, Wapadrand Boeredansgroep, Val Hotel en Caxton Network News
