OOS-KAAP. – ‘n Tienerseun (15) van Veeplaas is vir die moord op 4 Augustus 2023 op sy vriend (18) tot vyf jaar tronkstraf deur die New Brighton-streekhof gevonnis.
Luxulo Tyali sê die beskuldigde se ouderdom, sowel as die feit dat hy ‘n eerste oortreder is, is met die vonnis in ag geneem. Hy sal eers sewe dae onder toesig met terugrapportering aan die hof by die Enkuselweni Secure Centre gehuisves word. Daarna sal hy na die Burgersdorp Child And Youth Centre oorgeplaas word.
Die tienerseun het skuldig gepleit, nadat hy sy vriend veelvuldige kere met ‘n mes gesteek het. Vier vriende was die dag saam en het ‘n kennis teëgekom. Tydens ‘n konfrontasie het die oorledene ‘n vuurwapen gesien en gevlug. Die drie vriende het hom gesoek, aangesien hulle vroeër tik gekoop het. Hy het dit egter gerook.
“Die situasie het eskaleer toe die oorledene ‘n mes uitgehaal en gedreig het om sy maats te steek. In reaksie hierop het die minderjarige, wat toe 14 jaar oud was, en sy makkers hom met klippe gegooi, wat die mes uit sy hand laat val het. Tydens die onderonsie het hulle die slagoffer verskeie kere gesteek en die minderjarige het ook die mes gevat en hom gesteek.”
Volgens die staatsaanklaer het die beskuldigde sedert hy 12 jaar oud was probleemgedrag gehad. Hy het dagga gerook en kokaïen gebruik.
“Die aanklaer het die noodsaaklikheid van gestruktureerde rehabilitasie beklemtoon om die minderjarige te help om die nodige vaardighede vir sy toekoms te bekom.”
“Ons moenie net die gevolge van kriminele optrede aanspreek nie, maar ook die onderliggende faktore wat bydra tot jeugmisdaad,” sê Barry Madolo, die direkteur van openbare vervolging in die provinsie.
