INTERNASIONAAL. – Die tiener Saleh Mohammadi (19), ’n lid van Iran se nasionale stoeispan, is van die eerste mense wat gehang is vir sy aandeel aan die betogings vroeër die jaar. Volgens bronne aan CBS, die BBC se Amerikaanse vennoot, was Mohammadi een van drie mans wat tereggestel is nadat hulle daarvan beskuldig is dat hulle twee polisiebeamptes in verskillende insidente tydens anti-regeringsbetogings in Januarie doodgemaak het. Dit is die eerste teregstellings wat in verband met dié betogings uitgevoer is.
Die teregstellings het Donderdagoggend plaaslike tyd in die noordelike provinsie Qom plaasgevind nadat die Hooggeregshof hul doodsvonnisse bekragtig het, het Iran se Tasnim, ’n semi-amptelike nuusagentskap wat met Iran se Revolusionêre Wagkorps (IRGC) verbind word, berig. Volgens die agentskap is hulle ook skuldig bevind aan “moharebeh” – oorlogvoering teen God – een van die aanklagte wat Iran gebruik om doodsvonnisse teen betogers en teenstanders van die Islamitiese Republiek op te lê.
Die landwye betogings, wat in Desember begin en in Januarie toegeneem het, is met gewelddadige optrede deur die Iranse owerhede onderdruk. Regse groepe sê duisende mense is in die onrus dood. Volgens hulle het die drie mans skuld onder marteling bely en is hulle sonder ’n regverdige verhoor tereggestel.
Bronne: BBC, The New York Times
