NOORD-KAAP. – ‘n Man (41) is Dinsdag tronkstraf van ses jaar opgelê nadat hy op 21 Januarie 2023 op Brandvlei ‘n tienermeisie met ‘n ysterpyp geslaan het.
Lt.kol. Sergio Kock sê die polisie is omstreeks 22:15 na ‘n klagte waar hulle die 15-jarige aangetref het wie se gesig bloei omdat die verdagte die slagoffer tydens ‘n argument met ‘n ysterpyp geslaan het. Die man is in hegtenis geneem en sy borgaansoek was suksesvol teengestaan. Hy is deur die Carnarvon-streekshof op ‘n aanklag van aanranding met die doel om ernstig te beseer tot ses jaar direkte gevangenisstraf gevonnis. Hy is ook onbevoeg verklaar om ‘n vuurwapen te besit.
Speur.konst. Anthony Willemse van Calvinia-GKS het die suksesvolle afhandeling van die saak en vonnisoplegging verseker.
