NAMIBIË. – Twee mense is dood en nagenoeg 40 beseer in ’n ongeluk Woensdag tussen twee toerbusse, ’n kleiner bus en een bakkie.
Een van die busse se remme het glo gefaal toe dit die Kuiseb-canyon binnegegaan het. Die bus het teen ’n aankomende toerbus gebots wat ’n meerderheid Portugese toeriste vervoer het. Twee van die Portugese toeriste het noodlottige beserings opgedoen.
Volgens berigte het die bus op sy sy geval voordat dit ’n bakkie en ’n kleiner bussie getref het. Nooddienspersoneel sê die twee kleiner voertuie het langs die pad gestop sodat die insittendes foto’s van die canyon kon neem.
Ambulanspersoneel het hulle vanaf Swakopmund en Walvisbaai gehaas om die insittendes te behandel. Ileni Shapumb, hoofondersoekbeampte van die Namibiese polisie op Erongo, sê ’n verklaring sal binnekort uitgereik word.
Bronne: Windhoek Observer, Portugal Pulse
