Maandag 3 Junie omstreeks 14:20 het ’n onbekende man na Kwa-motors in Gemdene, Kimberley, in ’n bloukleurige Toyota Corolla met registrasienommer PLZ 635 GP gery. Hy het ’n petroljoggie gevra om sy motor met petrol ter waarde van R150.00 vol te maak. Hy het gevra om ’n kaartmasjien te gebruik, waarna hy weggery het sonder om te betaal. ’n Saak van diefstal is geopen.
Dieselfde dag omstreeks 14:35 het ‘n onbekende man na Caltex Star-garage in Memorialweg, Kimberley, in ’n blou VW Polo met registrasienommer PLZ 635 GP gery. Hy het ’n petroljoggie gevra om sy motor met petrol ter waarde van R750.00 vol te maak. Hy het gevra om ’n kaartmasjien te gebruik, waarna hy weggery het sonder om te betaal. ’n Saak van diefstal is geopen.
’n Versoek is deur 10111 uitgereik om op die uitkyk te wees vir die tweede voertuig, wat deur konst. Afrika van Kimberley se sigbare polisiëringseenheid gevind is. Twee verdagtes is in albei gevalle vir diefstal van petrol in hegtenis geneem en sal vandag in die hof verskyn.
Die stasiebevelvoerder, kol. Belinda Rikhotso, het die lede vir hulle vinnige reaksie bedank.
