NOORD-KAAP. – Twee mans, 21 en 46 jaar oud, is in Nababeep in hegtenis geneem nadat hulle vermoedelik ’n huisroof op ‘n plaas in die Concordia-gebied gepleeg en ’n man ernstig beseer het.
Luidens ‘n verklaring van brig. Mashay Gamieldien, polisiewoordvoerder, het die klaer op 28 Oktober omstreeks 23:00 saam met die twee verdagte mans gekuier. In die vroeë oggendure van 29 Oktober het een van die verdagtes glo die klaer wakker gemaak en dagga geëis. Die twee verdagtes het die klaer daarna in sy kamer toegesluit, aangerand en toiletware asook ander items gesteel voordat hulle die huis verlaat het.
Nababeep-polisiemanne het vinnig opgetree en die verdagtes teen 10:00 die oggend op ’n nabygeleë plaas in hegtenis geneem. Hulle is van huisroof en aanranding met die opset om ernstige liggaamlike skade te veroorsaak, aangekla. Hulle sal binnekort in die Springbok-landdroshof voorkom.
Die polisie se ondersoek duur voort.
