KWAZULU-NATAL. – Twee verdagtes in moordsake is gistermiddag doodgeskiet nadat hulle glo op die polisie op Melmoth losgebrand het.
Lt.kol. Nqobile Gwala sê die polisie het Saterdagoggend omstreeks 06:00 klagtes oor moorde ontvang. Drie gewapende mans het na bewering ‘n huis op Ulundi binnegegaan en lukraak op ‘n familie geskiet. Vier familielede is op die toneel dood, met ‘n vyfde een wat onderweg na ‘n hospitaal oorlede is. Die oorledenes is as Mandlenkosi Mayise (66), Delisile Mayise (63), Phemile Mayise (36), Bongathini Mayise (34) en Phindile Mayise (29) geïdentifiseer.
Die sake is deur die provinsiale georganiseerde misdaadeenheid ondersoek. Dinsdagmiddag het polisielede van die nasionale intervensie-eenheid ‘n wenk ontvang oor huurmoordenaars wat vermoedelik by die Ulundi-moorde betrokke was.
Toe die polisie die huis op Melmoth nader, het twee gewapende mans uitgekom en lukraak op hulle geskiet. Twee verdagtes, vermoedelik in hulle 30’s, is noodlottig in die oor-en-weer-skietery gewond.
‘n Rewolwer en geweer, asook ammunisie, is by die oorlede verdagtes gekry. Binne die huis is op vier selfone en haelgeweer-ammunisie afgekom en met verdere ondersoek ook op ‘n haelgeweer, selfgemaakte vuurwapen, pistool en gedeeltes van ‘n rewolwer. Die gekonfiskeerde wapens sal ballistiese toetse ondergaan.
Die skietvoorval is vir ondersoek by Opod aangemeld.
