KWAZULU-NATAL. – Twee insittendes van ‘n bus het gesterf en 79 het beserings opgedoen toe ‘n bus Maandagmiddag op die R618 in Kwa Vilakazi gerol het.
Craig Botha van KwaZulu Private Ambulance Service sê die diens het op berig van die ongeluk reageer en ‘n bus wat beheer verloor en gerol het op die ongelukstoneel aangetref. Twee insittendes het noodlottige beserings opgedoen en is dood verklaar.
“Paramedici het vinnig ‘n chaotiese toneel beoordeel en gevind dat agt pasiënte kritieke beserings opgedoen het, nege ernstige beserings en 62 geringe beserings.”
Botha sê die beseerdes is gestabiliseer en daarna vir verdere mediese behandeling na verskeie fasiliteite vervoer.
