KWAZULU-NATAL. – Twee verdagtes is Maandag in Empangeni tydens ‘n skietery met die polisie noodlottig gewond.
Kol. Robert Netshiunda sê polisiebeamptes was op roetine-patrollie toe ‘n geparkeerde wit bakkie langs ‘n suikerrietland op die ou Mtubatubapad opgemerk is. Die voertuig is genader, waarop daar na die polisiebeamptes geskiet is. ‘n Oor-en-weer-skietery het ontstaan, waartydens twee verdagtes doodgeskiet is. Twee vuurwapens en ammunisie is in die verdagtes se besit gevind.
Netshiunda sê voorlopige ondersoek het aan die lig gebring die voertuig is Vrydag in KwaMsane tydens ‘n huisroof gesteel. Arrestasielasbriewe is vir die verdagtes op aanklag van moord uitgereik.
