KWAZULU-NATAL. – Twee verdagtes is in hegtenis geneem nadat ‘n raadslid (40) van Sundumbili Dinsdagaand in sy huis doodgeskiet is en sy suster (42) gewond is.
Kol. Robert Netshiunda sê die arrestasies is binne ‘n paar uur gemaak. Openbare Orde-polisiëringslede was besig met roetinepatrollies toe hulle die twee verdagtes in die straat opmerk. Die mans is voorgekeer en deursoek, waarna twee vuurwapens, waarvan die reeksnommers afgevyl is, in hulle besit gekry is. Beide is vir die besit van ongelisensieerde vuurwapens in hegtenis geneem. Tydens verdere ondersoek van die polisie se taakspan is die twee verdagtes met die moord en poging tot moord verbind.
Volgens rapportering is die twee verdagtes na die raadslid se huis met die versoek om hom te sien. Toe hy uit sy huis gaan, is daar op hom geskiet. Sy suster, wat tussenbeide probeer tree het, is gewond. Beide is na ‘n plaaslike mediese fasiliteit gehaas, waar die raadslid met aankoms dood verklaar is.
Netshiunda sê die twee verdagtes is ook gekoppel aan die skietdood van ‘n persoon op 25 Januarie in Sundumbili. Die verdagtes sal vandag op aanklagte in die Nyoni-landdroshof voorkom.
