KWAZULU-NATAL – ‘n Botsing tussen twee vragmotors en vier voertuie op die N3 het vanoggend net ná 07:00 agt mense beseer.
Garrith Jamieson van ALS Paramedics het bevestig dat paramedici chaos op die toneel aangetref het, met die hele N3 in die rigting van Pietermaritzburg gesluit.
‘n Triage-stasie is onmiddellik opgestel en agt persone is met matige tot kritieke beserings op die toneel gestabiliseer voordat hulle na verskeie hospitale in Durban en Pietermaritzburg vervoer is vir verdere mediese behandeling.
Die N3 in die rigting van Pietermaritzburg bly gesluit terwyl noodwerkers die toneel opruim. Motoriste word aangeraai om hierdie area te vermy en alternatiewe roetes te gebruik totdat die pad weer oopgestel word.
