OOS-KAAP. – Twee vroue, onderskeidelik 65 en 40 jaar oud, asook ‘n meisie (9), is Maandagaand in Malibalestraat, Soweto-on-Sea, in KwaZakhele doodgeskiet in ‘n huis aangetref.
Lt.kol. Siphokazi Mawisa, polisiewoordvoerder, sê in ‘n verklaring die gemeenskap het skote gehoor en die polisie ingelig, waarna die slagoffers in die huis gekry is. Mediese personeel het hulle op die toneel dood verklaar.
Speurders van die provinsiale eenheid vir ernstige en geweldsmisdaad is op soek na verdagtes wat vir die drie geregistreerde moorde verantwoordelik is.
Die motief en omstandighede is nog onbekend en maak deel uit van die ondersoek. Die name van die oorledenes sal bekend gemaak word nadat hul naasbestaandes hulle uitgeken het.
