WATERLOO, KZN. – ’n Tweejarige seun het Maandagmiddag ernstige wonde opgedoen toe hy deur drie honde in Waterloo gebyt is. Na bewering het die honde uit ’n erf ontsnap en die seun in die straat aangeval.
Volgens Reaction Unit South Africa het hulle die seun met diep gesig- en beenwonde aangetref. Die seun en sy maats het glo in die straat gespeel toe die honde deur gate in ’n heining ontsnap het.
Sy maats het gevlug en hulp gaan soek. Die eienaar van die honde was nie tydens die voorval by sy huis nie. Dit is ook nie duidelik wat intussen van die honde geword het nie.
Die seun is op die toneel gestabiliseer en per ambulans na ’n hospitaal vir verdere mediese behandeling geneem.
Bronne: Reaction Unit South Africa, Twitter
