VRYSTAAT. – Thanduxolo Khalipa, die uitvoerende burgemeester van Matjhabeng- plaaslike munisipaliteit, is deur Odendaalsrus-landdroshof skuldig bevind op aanklagte van aanranding en crimen injuria.
Mojalefa Senokoatsane, woordvoerder vir die NVG, sê Khalipa het op drie aanklagte tereggestaan – een van aanranding en twee van crimen injuria. Hy het sy bestuurder en beskermer tydens ‘n gemeenskapsvergadering aangerand en beledig.
“Spanning het tydens die gemeenskapsvergadering toegeneem en gemeenskapslede het namate rumoerig geraak, wat sy beskermers genoop het om in te gryp en hom van die toneel te probeer weglei. In reaksie hierop het Khalipa glo sy beskermers fisies begin aanrand en neerhalende opmerkings gemaak.”
Die burgemeester se beskermers het ‘n saak teen hom oopgemaak, wat tot die aanklagte gelei het.
Die saak is vir vonnisoplegging tot 12 Desember uitgestel.
