Navorsers van die Universiteit Stellenbosch (US) het bygedra tot ’n groot internasionale studie wat ondersoek hoe toegang tot doeltreffende antipsigotiese medikasie vir mense met skisofrenie in lae- en middelinkomstelande verbeter kan word.
Martin Viljoen, US-woordvoerder, sê die studie het in The Lancet Psychiatry verskyn en is deur navorsers van die Universiteit van Oxford as deel van die GALENOS-inisiatief gelei. Die navorsing bring die jongste wêreldwye bewyse oor die behandeling van skisofrenie saam met insette van kundiges uit Ethiopië, Nigerië, Rwanda en Suid-Afrika.
Die navorsers het ’n stel prioriteitsmedisyne geïdentifiseer wat volgens die beskikbare bewyse die beste balans tussen doeltreffendheid en verdraagsaamheid bied, met die doel om toegang tot behandeling in hierdie lande te verbeter. Prof. Soraya Seedat, psigiater en navorser aan die US en een van die studie se outeurs, sê die navorsing is veral belangrik vir Suid-Afrika omdat dit verder gaan as die vraag watter medisyne werk. Die studie fokus ook op hoe mense met skisofrenie werklik toegang tot dié behandelings kan kry binne gesondheidstelsels.
Na raming leef sowat 23 miljoen mense wêreldwyd met skisofrenie. Antipsigotiese medisyne vorm ’n belangrike deel van die behandeling, maar toegang tot noodsaaklike medisyne bly in baie lae- en middelinkomstelande ’n uitdaging weens onder meer beskikbaarheid, bekostigbaarheid en toegang. Die navorsers sê die aanbevelings kan toekomstige gesondheidsbeleid, behandelingsbesluite en pogings om die beskikbaarheid en bekostigbaarheid van noodsaaklike geestesgesondheidsmedisyne in Afrika en ander lae- en middelinkomstelande te verbeter, ondersteun.
Die studie is deur die Wellcome Trust befonds.
Bronne: Universiteit Stellenbosch, Universiteit Oxford/GALENOS, The Lancet Psychiatry
