WES-KAAP. – Veiligheid is op strande in die Mosselbaai-omgewing opgeskerp nadat ‘n vrou Vrydagoggend omstreeks 05:15 op Diasstrand met ‘n mes gesteek is.
Sers. Christopher Spies sê aan Nuusflits dit is ‘n geïsoleerde voorval wat as ernstig gesien word. Hy bevestig voorts die Da Gamaskop-polisie, Mosselbaai-wetstoepassingsagentskappe, buurtwag-vrywilligers en Community in Blue-vrywilligers, asook plaaslike veiligheid, het patrollies gedurende sekere tye op die strand opgeskerp.
Na bewering het twee slagoffers op die strand gestap toe hulle deur twee verdagtes oorval is. Die slagoffers is met messe gedreig, waartydens een aangerand is. Die verdagtes het met selfone van die toneel gevlug.
Spies sê speurders ondersoek ‘n roofsaak en is op soek na die verdagtes. Enigiemand met relevante inligting word gevra om konst. Jan Hendrik Els by 082 469 7583 te bel.
“Ons doen ‘n beroep op die publiek om enige verdagte aktiwiteit of persone te rapporteer aan diegene wat vir die feestyd ontplooi is. Die veiligheid van besoekers en ons gemeenskappe is gedurende hierdie tydperk van uiterste belang en die zero tolerance-benadering wat aangepak is sedert die bekendstelling van die Veiliger Feesseisoen-bedrywighede sal gehandhaaf word.”
