OOS-KAAP. – Bulelani Daluka (42) het Maandag vlugtig in die KwaBhaca-landdroshof verskyn op ’n aanklag van aanranding met die doel om ernstig te beseer. Die saak is tot 23 September uitgestel, en Daluka bly in aanhouding.
Nuusflits het voorheen soos volg berig:
’n Veiligheidswag (42) het vandag in die hof verskyn nadat hy na bewering verlede Woensdag ’n meisieleerling (20) by ’n hoërskool in KwaBhaca aangeval en met ’n skerp voorwerp gesteek het. Volgens AO Majola Nkohli het die voorval omstreeks 20:00 by die skool plaasgevind.
Die leerling is met verskeie beserings na die hospitaal geneem, waar sy tans aansterk. Die insident is eers Vrydag by die polisie aangemeld, waarna die veiligheidswag Saterdag in hegtenis geneem is.
Die verdagte staan tereg op aanklagte van aanranding met die doel om ernstig te beseer.
