KWAZULU-NATAL. – ’n Verdagte is Sondagmiddag noodlottig gewond tydens ‘n skietery met die polisie in die Okhalweni-gebied in KwaMaphumulo.
Kol. Robert Netshiunda, polisiewoordvoerder, sê die polisie het inligting ontvang oor ’n man wat in besit van ’n vuurwapen was en met ’n voertuig in die Maphumulo-sakekern gery het. ‘n Operasie is geloods en die betrokke voertuig is langs ’n pad in Okhalweni aangetref. Toe die polisie die voertuig nader, was daar twee insittendes in die voertuig, sonder die bestuurder. Die bestuurder het aangeloop gekom na die voertuig, maar omgedraai toe hy die polisie sien. Hy is deur die polisie agternagesit, waartydens hy op die polisie losgebrand het. Die polisie het teruggeskiet en die verdagte noodlottig gewond.
’n Vuurwapen waarvan die reeksnommer afgevyl is, is in sy besit gevind. Geen polisiebeamptes is tydens die voorval beseer nie.
