MPUMALANGA. – ’n 39-jarige verdagte is in hegtenis geneem nadat hy probeer het om onwettig by die Oshoek-grens van Suid-Afrika na Swaziland te gaan. Hy is vasgekeer met R424 800 wat in ’n swart plastieksak versteek was.
Kapt. Dineo Sekgotodi sê die verdagte is deur die Grensbestuursowerheid opgemerk, deursoek en gearresteer. Die geld is gekonfiskeer.
Sekgotodi het verder gesê die saak is aan die Valke oorgedra, wat die ondersoek oorgeneem het. Tydens ondervraging kon die verdagte nie ‘n verduideliking oor die geld gee nie en die geld is ook nie ingevolge die wet verklaar nie. Hy is gearresteer en vir die besit van vermoedelik gesteelde eiendom aangekla. Die geld is as bewysstukke ingehandig.
Die verdagte sal vandag in die Elukwatini-landdroshof voorkom terwyl die ondersoek voortduur.
