OOS-KAAP.- ‘n Man, vermoedelik in sy laat 20’s, is Dinsdag in Motherwell deur lede van die nasionale intervensie-eenheid doodgeskiet, toe hy ‘n vuurwapen op hulle gerig het.
Kapt. André Beetge sê die eenheid het inligting opgevolg oor ‘n man wat in Nkumestraat in besit van ‘n ongelisensieerde vuurwapen was. Die verdagte het ‘n vuurwapen op die polisielede gerig en is doodgeskiet.
Beetge sê die polisie het op die vuurwapen en ammunisie beslag gelê, asook op ‘n seinstoringsapparaat (signal jammer) wat in die huis gevind is.
“Sake van rig van ‘n vuurwapen, geregtelike doodsondersoeke, besit van ongelisensieerde vuurwapens en ammunisie is by SAPD-Motherwell vir ondersoek geopen. Die geregtelike doodsondersoekdossier sal vir verdere ondersoek na die onafhanklike polisie-ondersoekdirektoraat oorgedra word.”
