POLOKWANE, LIMPOPO. – ’n Verdagte is Woensdag in hegtenis geneem na ’n beweerde rooftog by ’n algemene handelaar om 15:30 in Polokwane.
Volgens berigte het ’n groep gewapende mans die winkel binnegestorm en geld van die werknemers by betaalpunte geëis. Die klante is beveel om plat te lê.
Een van die werknemers het dit reggekry om die staalhek van die winkel te laat sak. In die geskarrel het ’n geweerskoot glo afgegaan wat een van die verdagtes gewond het.
Die klante en drie verdagtes het weggehardloop terwyl die vierde verdagte agtergelaat is.
Hy is tans onder polisiebewaking in ’n hospitaal. ’n Saak van besigheidsroof en poging tot moord is geopen.
Bron: SAPD
